Saudi Arabia indo thlawhtheihna kap thla Yemen ram an beih letnaah mi 31 thi

Kar liam ta Saudi Arabia indo thlawhtheihna Tornado Jet chu Yemen-a Houthi helten an kap thla a, hemi hnu hian Saudi-UAE ṭangrual sipaite chuan helte hi bei letin, civil mi 31 an thi a, mi dang 12 in hliam an tuar.

Yemen hel, Houthi chuan Saudi Arabia indo thlawh­theihna hi surface-to-air missile hmanga an kahthlak a nih thu an tarlang bawk. Saudi Press Agency chuan he thil thlen chhan hi kimchang takin engmah a la tarlang lo a, thlawlhtheihna khalhtute hi an thi em tih pawh sawilan a ni lo. 

Hemi hnu hian Saudi-UEA sipaite hian Yemen hmarlama a al-Jawf province chu an bei let nghal a ni. Houthi chuan an al-Jawf province beihnaah mi 31 thi zingah hian hmeichhia leh naupangte pawh an tel tih sawiin, hliam tuarte hi damdawi-in panpui nghal an nih thu a sawi. 

UN humanitarian coordinator for Yemen, Lise Grande chuan Yemen-ah civil mi tam tak tihhlum an ni chu a rapthlakin pawi a tih thu a sawi. Civil mite himna chu ngaihtuah tur a nih thu sawiin, Yemen ramin kum nga zet tualchhung buaina a neih tawh chinfel a la ni lo chu mak a tih thu a sawi a ni. 

Kum 2015-a Houthi helten president aṭagna Abd-Rabbu Mansour Hadi an paithlak hnu khan Yemen ramah hian Houthi leh Hadi thlawptute inkarah buaina a chhuak zui a, tun thlengin an la buai chhun­zawm reng a ni. 

Saudi-UAE kaihhruai Arab ṭangrual sipaite chuan President Hadi thlawpin, Houthi hel lakah beihpui an thlak zui a ni. Yemen rama beihpui thlakna atan hian Saudi Arabia leh UEA hian US, France leh UK aṭangin ralthuam, dollar tluklehdingawn tel man an lei tawh a ni. Mahse an beihpui thlaknaah hian civil mi eng emaw zat an thi tel tawh a, hei vang hian sawisel pawh an hlawh fo a ni.