Court-in Brazil President hlui Bolsonaro a fapain a tlawh khapsak

Brazil Supreme Court chuan an ram president hlui, pawn chhuak thei loa ina hren mek, Jair Bolsonaro chu a fapa, presidential candidate Flavio Bolsonaro nena khuahkhirh a nihna dan an bawhchhia nia sawiin, a fapa hi ni 90 chhung a pa a tlawh an khapsak.

Justice Alexandre de Moraes chuan Flavio-a'n social medial livestream a neihnaah, a pa hnen aṭanga a lehkha dawn a chhiar chhuah hnuah he thupek hi a tichhuak a ni. A pa lehkha thawnah hian politics lama a thawhpui hrang hrangte chu an inrem lohnate dah ṭha a, a fapa thlawp turin a chah a ni. Court chuan Jair Bolsonaro lawyer-te hnenah a lehkha thawn hi online-ah tihchhuah a ni tih a hriat leh hriat loh sawifiah turin an ti a ni.

Jair Bolsonaro hi kum 2022 inthlana hnehna a chan zawh loh hnuah, inthlan result tihdanglam tuma puha ruahmanna kalpuiah puh a ni a, kum 2025 khan thiam loh chantir a ni. Jail-a hun eng emaw chen a awm hnuah, a inah pawn chhuak thei loa hren a ni a, social media bakah pawn lam mi a biakpawh theihna tur dangte pawh hman phalsak a ni lo bawk.

Bolsonaro fapa, Flavio hi President thlanna neih turah far-right party candidate a ni a, hei vang hian court chuan inthlan thawh khatna neih hun, October 4 thleng a pa hi hmuh a khap. Flavio hian inthlan campaign chhungin a pa hi a hmu thei dawn ta lo a ni.