Raltlan document lem siamsak vangin Nepal minister hlui 2 thiam loh chantir

Nepal court chuan an ram minister hlui pahnih chu Nepal mi ṭhenkhat, US-a an pem theihna tura Bhutan raltlan anga document an siamsak ṭhin avangin thiam loh a chantir.

Kathmandu-a district court-in raltlan anga document lem an siamsak avangin deputy prime minister leh energy minister hlui, Topo Bahadur Rayamajhi chu kum li tang tur leh rupees 40,000 chawi turin a hrem a; home minister hlui Bal Krishna Khand chu kum hnih tang tur leh rupees 20,000 chawi turin a hrem bawk. Hremna hi Thawhlehni zan khan tihchhuah a ni.

Rayamajhi hi hren mek a ni a, Khand erawh bail-in a chhuak a ni. An puhnaah hian inhnamhnawihna an nei lo niin an sawi a, an lawyer-te chuan court thutlukna hi ngaihtuah ṭha leh tura an ngen tur thu an sawi. Minister hlui pahnihte bakah, document lem siamna kaihhnawihah hian mi dang 14 thiam loh chantir an ni bawk. Hetih lai hian he thila inhnamhnawiha puh mi dang pasarihte erawh thiam chantir an ni thung.