Hong Kong-a nawrh huaihawttute'n ramdang thlawpna an ngen
Hong Kong-a nawrh huaihawtte chu kar kal ta Inrinni khan Victoria Park-ah pungkhawm lehin, ramdangte thlawpna an ngen.
Nawrh huaihawtte hi thawmhnaw duma inthuamin, hmaikawr an vuah bawk. Hong Kong-a mimal zalenna leh democracy tundin a nih theih nana ramdangte thlawpna phutin an kalkhawm an ni. New York, London leh Sydney-ah te pawh nawrh huaihawt a ni bawk.
Hong Kong police-te chuan nawrh huaihawtte hi pepper (hmarcha) spray, mittui tlakna hlo leh tuiin an hnawt darh. Extradition bill duhlohna nawrh an huaihawt hnuah, sorkar chuan he bill hi a titawp a, mahse November thlaa district inthlan neih tura thil dik tawk loh a awm avang pawhin nawrh hi an chhunzawm reng bawk.
Hong Kong sorkarin extradition bill a tihtawp hnu pawhin, nawrh hi an la chhunzawm zel a ni. Extradition bill bakah sorkar lakah thil phut pali an la nei a, sorkain a tihhlawhtlin sak hma chu nawrh hi chhunzawm zel an la tum.
Heng an thil phut pali te chu - zalen taka inthlanna felfai leh dik neih te, nawrh huaihawtte chunga rawng taka police an chet ṭhinna duh lohna te, Extradition bill duhlohna an lantir chhunga man tawkte chhuah zalen, fugitive bill duh lohna an lantir avanga sorkarin nawrh huaihawtte "rioters" tia a koh sut te an ni.