IS firfiakte'n Mali an beihnaah sipai 49 an thi

Africa khawthlang, Mali rama Menaka region-a Indelimane hmunah kar kal ta Zirtawpni khan, Malian sipai outpost chu Islamic State (IS) firfiakte'n beiin sipai 49 an thi.

He inbeihnaah hian Malian Armed Forces (FAMa)-te chuan an sipai 49 an thih bakah hliam tuar pathum an awm thu an sawi. Sipai 20 an him tih an tarlang bawk. Malian sipai 49 bakah France sipai pakhat a thih thu tarlan tel a ni bawk. Kum 24 mi French corporal (Brigadier) Ronan Pointeau chu indo motor a khalh laiin, rahpuah bomb a chil vangin a boral tih French defence ministry a tarlang. 

Malian sipai outpost beitu an nih thu hi IS firfiakte chuan an social media channel-ah an sawi. French Armed Forces Minister Florence Parly chuan an sipai thihna hmun hi tlawh thuai a duh thu sawi langin, Malian thuneitute nena inbiakna neih a duh thu pawh a sawi. France President Emmanuel Macron chuan an sipai Pointeau a thih chungchangah hian a tawrhpuina thu a sawi chhuak ve bawk a ni. 

Mali hmar lam hi kum 2012 aṭang khan Al-Qaeda firfiak nena inzawm Islamic firfiak jihadist-te chuan an thunun a, France chuan Mali sipai ṭanpui tur hian a sipaite a tir lut bawk a ni. Hemi hnu hian jihadist firfiakte leh Mali sipaite inbeihna hi a thleng fo a, tualchhunga hnam hrangte inkarah buaina a chhuak fo bawk. 

Thla hlui khan Mali-a Boulkessy leh Mondoro-a army outpost-te chu jihadist firfiakte hian an lo bei tawh bawk a, hetah hian an sipai 25 an thih bakah midang 60 chu chin hriat lohin an awm a ni.