Myanmar-ah mi 500 chuang phurtu lawng pahnih chin hriat lohin awm

UN refugee agency chuan Myanmar raltlan 500 chuang phurtu lawng pahnihte chu an chin hriat a ni lo a, tuipuiah chesualin a chuangte pawh an thi vek nia rin a nih thu nimin khan a tarlang.

Lawng pahnih hian June thla tawp khan Rakhinte state an chhuahsan a, lawnga chuang tam zawk hi Rohingya mite an ni a, Bangladesh refugee camp-a aṭanga rawn kal ṭhenkhat pawh an tel nia sawi a ni bawk. Lawng chhuak hmasa zawkah hian mi 250 vel an chuang a, an chhuah hnu rei vak loah biak pawh theih lohin an awm a ni. A pahnihnaah hian mi 280 vel an chuang bawk a, July 8 khan Irrawaddy tuipuiah chesualin a pil ta nia hriat a nih thu UN agency chuan a sawi.

International Organization for Migration (IOM) leh UN High Commissioner for Refugees (UNHCR) chuan heng lawng pahnihte hi tuipui lama zin chhuah hun loh lai, tuipui dinhnun a hlauhawm laia chhuak an nih thu an sawi. Lawng chetsual dan leh thi zat hi official-a sawichian erawh a la awm lo.

Myanmar sipaiten Rohingya-te laka beihpui an thlak hnuah, Bangladesh ramah mi tam tak tlanchhiain, refugee camp hrang hrangah mi mtd 1.2 vel an la khawsa mek a ni. Myanmar rama awm chhunzawmte pawh an dinhmun a ṭha lo hle a, an chetvel dan turah khuahkhirhna siamsak an ni bawk. Hei vang hian dinhmun ṭha zawk beiseiin, ram dangah an tlanchhe nasa hle. An tlanchhiat tumna lamah tuipuiah mi tam takin nunna an chan a ni. UNHCR data-in a tarlan danin, kum 2025 chhung khan Rohingyi mi, tuipui kaltlanga ram danga tlanchhiat tum mi 6,500 chu tuipuia chetsualnaah an thi a ni.