Baghdad green zone rocket-in bei

Iraq khawpui Bagh­dah-a Green Zone chu rocket pali hmanga beih a ni tih Iraq sipaite chuan nimin khan an sawi.

Rocket pathum hi chu U.S. embassy awmna hmun, uluk taka venhimna kalpuina hmun a fuh a ni.

Iraqi Joint Operations Command (JOC) chuan hemi chungchangah hian thuchhuah siamin inbeih­na hi Inrinni zana thleng a nih thu an tarlang a, eng firfiak pawl nge tih an hriat loh chuan rocket pali hmangin Green Zone hi beiin pakhat chuan Palestine street-a Police Academy bula awm Hashd Shaabi headquarters a fuh tih an tarlang bawk.

Thi leh hliam an awm tarlan ni lo mah se bung­rua erawh a chhe nual niin an tarlang a ni. Rocket kahchhuah hi pakhat chiah a puak niin an sawi.

Uluk taka venhimna kalpuina hmun Green Zone hi firfiakte'n an bei fo a, laipui leh rocket hmangin ṭum eng emaw zat an bei tawh a ni. Green Zone hi km 10 bial vela zau niin Tigris lui kamah a awm.

Iraq sipaite'n firfiak an beihna kawng thlawp tur hian US chuan sipai 5000 vel dah luh tawh a ni. Mahse U.S. drone-in Baghdad airport bula Qassem Soleimani a thah hnu khan Iraq par­liament chuan ram­dang sipai an rama an awm tawh lohna tur reso­lution a siam thung.