Israel-in Lebanon, Syria leh Gaza-ah sipai dah chhunzawm dawn

Israel defence minister Israel Katz chuan US defence secretary, Pete Hegseth hnenah Lebanon, Syria leh Gaza Strip-a 'security zone' ah Israel chuan sipai dah chhunzawm zel a tum tih a hrilh.

Katz office-in thuchhuah a siamah, hruaitu pahnihte hi Nilaini zan khan inbiain, Israel ramri leh a chhehvela cheng Israel mite firfiakte laka venhimna atan, Israel chuan ram pathuma sipai dah chhunzawm zel a tum thu hi a sawi a ni. 'US hi kan ramri veng a, kan aia hma la turin kan dil ngai lo" a ti.

Minister-in he thu a sawi hma hian, US president Donald Trump chuan Israel prime minister Benjamin Netanyahu hneah Syria leh Lebanon aṭanga Israel sipaite la chhuak turin a ngen nia sawi a ni. Trump chuan Syria rama Israel sipai dah chuan buaina a tizual zawk a ni tiin, dah tawh lo turin a ti.

Kum 2024 December thlaa Syria president aṭanga Bashar al-Assad paihthlak a nih hnuah, Israel hian Golan Heights-a UN patrolled buffer zone-ah sipai a dah a ni. Lebanon-ah pawh Lebanon ram chin aṭanga km 10 vel, security zone-ah Israel sipaite an la awm chhunzawm zel bawk. Gaza Strip-a hmun 60% vel chu Israel thununna hnuaiah a awm bawk a ni.