Burundi-ah ruang 6,032 lai chhuak

Africa chhak lama awm, Burundi rama Karusi Pro­vince-a thlan hmun paruk aṭangin ruang 6,032 laih chhuah a nih thu Burundi Truth and Reconciliation Commission chairman Pierre Claver Ndayicariye chuan a sawi.

Kumin January aṭang khan Burundi sorkar chuan an ramchhunga thil laih chhuah hnapui a kal pui ṭan a, kar liam ta Zirtawpni khan thlan hmun paruk aṭang hian mihring ruang 6,032 bakah silai mu sang chuang laih chhuah a ni ta a ni. Burundi ramchhunga thil laih chhuah hnapui kalpui a nih hnua mihring ruang laih chhuah tam ber ṭum a ni bawk.

Burundi sorkar chuan kum 1885 aṭanga kum 2018 inkara ramchhung buaina leh harsatna hrang hrang vanga thi leh ruangte zawn hna thawk turin kum 2014 khan commission a din a, ruangte leh thil dang laih chhuahna hmun 4,000-ah sorkar chuan ruahmanna (map) a siam a ni. 

Kum 1962 khan Belgium aṭangin Burundi hi a indang a, kum 1993 aṭangin tualchung indona (civil war) a chhuak a, buaina chhuah chhan hi Hutu leh Tutsi hnam innghirngho vang a ni. Kum 2005 khan tual­chhung indona tawpin, buaina chhuak vang hian mi 300,000 vel an thih thu leh buaina tuartu hi mi 142,000 chuang an awm thu tarlan a ni.

Civil war hnu hian politics lamah tualchhung buaina a chhuak chho leh a, kum 2005 aṭanga president dinhmun chelhtu, Pierre Nkurunziza chuan kum 2015 April 25 khan a term thumna atan President chuh leh a tum thu a puang a, mahse hei hi eptu party te bakah kohhran leh civil society chuan dodalin, an ram danpui kalh a nih ti sawiin an dodal zui a ni. Kumin May thla hian presisent thlanna neih leh tur a ni.