Zelenskyy-a'n Ukaine sipai hotu a ban

Ukraine president Volodymyr Zelenskyy chuan an ram army commander-in-chief Oleksandr Syriskyi chu Thawhlehni khan a ban. Hemi hma lawk hian defence minister Mykhailo Fedorov pawh ban a lo ni tawh a, mipui lungawi loten khawpui hrang hrangah nawrh an huaihawt a ni.

Kum 60 mi, Syrskyi hi Soviet Union a la nih laia Russia rama Vladimir region-a piang a ni a, Moscow-a sipai school-ah zirin, a zirpui ṭhenkhat chu tunah Russia sipai hotute an awm. Ukraine sipai hotu dinhmun a chelh chhungin sawiselna pawh a tawk fo a, thil thar ngaihtuah chhuak thiam loah te an puh. Bakhmut venhimna an kalpui danah sipai tam tak nunna chan phah khawpa hun a pawtsei avangin sawisel pawh a lo hlawh tawh hle.

Syrskyi thlaktu atan kum 43 mi, Mykhailo Drapatyi chu ruat nghal a ni a, ani hi Ukraine Joint Forces-a commander a ni. Ukraine khawthlang lama piang leh seilian, Kharkiv military school aṭanga zir chhuak a ni.

President Zelenskyy chuan Syrskyi chu an ram tana a hnathawhte avangin lawmthu a hrilh a, a bikin kum 2022-a Russia-in an run tirh lam khan an khawpui, Kyiv chu ṭha takin a venghim thei a ni, a ti. Defence minister hlui, Fedorov pawh a hmu tih Zelenskyy chuan sawiin, dinhmun pawimawh tak chelh tura a sawm thu a sawi. Mahse, Fedovor hian President sawmna hi a pawm leh pawm loh sawilan a ni lo.