Spain leh France-ah ram kang thleng chhunzawm

Spain leh France-ah ram a la kang chhunzawm zel a, hmun ṭhenkhatah ramkang ziaawm deuh tawh mah se, a la thlen chhunzawm leh mai hlauhthawnna a la sang hle tih kangṭhelhtute chuan an sawi. Spain ram laili, Guadalajara province-a ramkang nasa tak chu a ziaawm tawh avangin tualchhung mi ṭhenkhat chu an inah an haw phalsak an ni tawh bawk .

Data aṭanga a lan danin, kumin hian Europe-ah kum 20 kal ta chhunga kum tina ramkang ṭhin aiin ram a kang nasa zual tawh a ni. Europe hi khawvel khawmnualpui zingah lum chak ber a ni mek bawk a, kumin chhungin khawlum zual, heatwave chu an hmachhawn bawk. Khawlum zual kaihhnawihah mi tam takin nunna an chan tawh a ni.

France chhim thlang lam, Girande bialah ram kang an ṭhelhnaah kangṭhelhtu pahnih an thi tawh. Bordeaux leh Cap Ferret inkarah ram hectare 100 a zau a kang a, a bul hnai khuaa cheng mi 600 vel chu sawn chhuah an ni. Khua a roin a lum em em a, hei vang hian ram kang a thleng fo a ni. Kuminah France-ah hian ram hectare 40,000 vela zau a kang tawh a ni. An ram chhim chhak lam, Hautes-Alpes ah ram kang nasa tak a la thleng mek bawk.

Spain ramah pawh Guadalajara biala ram hectare 32,000 a zau a kang tawh bawk. Ram kang vang hian municipality 34 huam chhunga chengte chu insawnchhuah tir an ni a; mahse, kangmei chhuak hian ziaawm lam a pan deuh avangin khaw pangaa chengte chu an in lamah haw phalsak an ni. Nilaini khan prime minister Pedro Sanchez chuan Guadalajara bial hi a tlawh a, kumina an ramah ram kang nasa tak ṭum 22 a thleng tawh tih a sawi a, ram kang thleng fo veng tur hian nasa zawka hma an lak a ngaih thu a sawi.

Europe ram hrang hrangten khaw lum zual an tuar mek a, Greece-ah chuan khaw lum lam hian 41 degree Celsius a tling a, thuneitute chuan chhun laiah ni sa hnuaia hnathawh an khap. Cyprus pawhin chhun khawlum zual laiin pawn lama hnathawh a khap ve bawk.