United Nations hotuin Rohingya buaina chingfel thuai turin Myanmar ngen

United Nations Secretary-General Antonio Guterres chuan Rakhine state, Myanmar aṭanga Bangladesh rama tlan­chhia, Rohingya Muslim raltlan 730,000 te harsatna tawh mek chungchang chu chinfel sak dan ngaihtuah thuai turin Myanmar sorkar a ngen. 

Bangladesh rama Rohingya raltlan harsatna tawk mekte chu ngaihven a, mawh­phurhna la turin Guterres chuan a ngen. An buaina chinfel sak dan ngaihtuah leh, Myanmar rama him taka  hruai kir leh an nih theih dan turte ngaihtuah sak turin a ti a ni. 

Pathianni khan Guterres hian Myanmar telna, Association of Southeast Asian Nations (ASEAN) ram hruaitute chu meeting a neihpui a ni. ASEAN hruaitute hi kum tinin issue pawimawh ngaihtuahin an inhmukhawm ṭhin a, hemi rual hian ramchhung inrelbawlna thil bikah erawh inrawlh lo turin policy nghet tak an nei thung. 

Rohingya muslim-te chungchangah hian ASEAN member ramte ngaihdan erawh a inang chiah lo. Ram 10 awmnaa member tam zawk chuan Myanmar sorkar thiltih dana inrawlh loh an thlawp laiin, Muslim tamna ram Malaysia leh Indonesia erawh chuan Rohingya te chungchangah hian ASEAN chu tun ai hian inrawlh nasa zawk se an duh a ni. 

Myanmar sipaiten Rakhine state-a Rohingya helho laka beihpui an thlak avangin he state-a cheng, Rohingya muslim nuai sarih chuang chu Bangladesh ramah an tlanchhia a ni. Raltlante hruai kir an nih theih nan Myanmar leh Bangladesh chuan inremna an siam tawh a, mahse raltlante hian an tan Myanmar rama kir chu a la him lo nia sawiin an la kir duh lo a ni. Hetihlai hian human rights group lam chuan Myanmar sorkar chuan raltlante an kir duhna turin ruahmanna felfai tak leh, an himna tur a ngaihtuah ṭha lo tih an puh ve thung.