Iraq-a nawrh huaihawtte'n Iran consulate an bei

Iraq khawpui Baghdad chhim lama awm Karbala khuaa Shia holy city-ah Iraq mi nawrh huaihawtte'n Pathianni khan Iranian consulate chu an bei a, Iran flag chu la thlain Iraq flag an tar khum.

Security force-te chuan nawrh huai­hawtte hi hnawhdarh tumin, an silaite chu van lamah an hmet puak a, nawr huaihawtte hian lungin security forces-te hi an lo tawng let ve bakah, motor ke te an hal a ni. Nawrh huaihawtte hian Iran consulate bangah te chuan meichhemin, mei alh chu consulate chhungah hian an theh lut bawk. He buaina thlengah hian thi leh hliam na tak tuar an awm loh thu an tarlang.

Iraq prime minister Adel Abdul-Mahdi chuan Pathianni khan nawrh huai­hawtte'n kawng an dan chu dang tawh lo turin a hriattir a, mahse an zawm duh chuang lo a ni. Adel Abdul-Mahdi hian bazar, factory, school leh university khar a nih chu hawng tawh turin a hriattir bawk. Heng avang hian US dollar tluklehdingawn teh meuh mai chu an ramin a hloh tawh thu a sawi.

Nawrh huaihawtte lungawi loh chhan ber hi an ram economy tlak chhiat vang te, hna leh vangtlang tana hamṭhatna sorkarin a  ngaihtuah sak tawk loh vang a ni a, sorkar thar din an ngiat bawk a ni.