Hong Kong-a shopping mall-ah chem hmanga inbeihna thleng

Hong Kong-a City plaza mall-ah Pathianni khan mi pakhatin chem hmangin midangte a beichiam a, mi pali a vih bakah politician Andrew Chiu beng a seh sak bawk. Pawikhawihtu hi helai hmuna nawrh huaihawt mekte chuan an sawisa hman nual a ni. 

District Councillor Andrew Chiu chu a beng veilam zahve seh chhiat sak a ni a, damdawiinah a rang thei ang bera phur nghal a ni bawk. Pro-democracy campaigner Joshua Wong chuan a thawhpui Andrew Chiu kut thlak a ni chu a dem thu a sawi. 

Chem hmanga beitu hi police-te chuan tu nge a nih tih leh, engvanga bei nge a nih thu engmah an tarlang lo. City plaza mall-a nawrh huaihawtte hi November thlaa district inthlan neih turah inthlanna felfai tak a awm phut vanga pung khawm an ni.