Muhammad Yunus bail phalna pawmsak

Bangladesh khawpui Dhaka-a 3rd Labor Court acting chairman Zakia Parveen chuan micro-credit pioneer leh Nobel laureate, Muhammad Yunus bail dilna chu a phalsak.

Labour court hian a hma pawhin court-ah Yunus hi inlan turin an lo hriattir tawh a, mahse ramchhung chhuahsana a zin avangin a inlan lo. High court-in November 7 hmaa court-a inlan turin Yunus hi a hriattir a, November 7 ral hmaa man rih lo turin a hriattir bawk.

Court official Wasiur Rahman chuan Yunus hi taka 10,000-a bail a chhuah tir a nih thu a sawi. Yunus laka thubuai thehluh a nih chhan hi Software company Grameen Communications-a chairman a nih laia hnathawk pathum a ban vang a ni. 

Heng hnathawk pathumte hian July thla khan court-ah case hi an file a, trade union an rawn hnuah dan dik loa ban a nih thu an sawi ve bawk. Hetih lai hian Yunus-a lawyer Mustafizur Rahman Khan chuan, Yunus an hekna zawng zawng hi court-in a chinfel hma loh chuan jail-ah khung theih a nih loh thu a sawi.

Bangladesh sorkar chuan Yunus ta Microfinance company Grameen Bank chet dana thil fel tawk loh a awm avangin, an chhui mek bawk. Grameen Bank-ah hian mihring maktaduai 8 member an awm a, chung zinga 97% chu hmeichhia an ni. Branch 2568 a neih bakah, khaw 81,677-ah he bank service hi a thleng phak a, Bangladesh-a khaw awm zawng zawng zaa 93-ah a bank service hian a thleng pha vek a ni.