Vietnam mi 39 thihna kaihhnawihah mi 8 man
Vietnam mi 39 te, refrigerated truck container chhunga thia an hmuh kaihhnawihah, Vietnam police-te chuan England chhimthlang lamah mi pariat an man thu an sawi.
Mi pariatte hi Pathianni khan man an nih thu police-te chuan an sawi a, heng thil thleng hi mihring sumdawnna kaihhnawih thil a nih thu an tarlang bawk. British police-te chuan October 23-a boralta Vietnam mi 39-te hi a tirah chuan China mi an nih an ring a, mahse Vietnam rama chungkaw ṭhenkhatte chuan an chhungte an bo thu police hnenah an hraittir a, hemi hnu hian Vietnam mi an nih thu tih chian a ni.
He thihna chungchangah hian British police-te chuan Ireland chhimchhak lama khawsa kum 25 mi Maurica Robinosn chu ringhlelin an man. An sawi dan chuan Belgium-a Zeebrugge khua aṭangin England-a Purfleet khuaah truck hi a tlan a, hetah hian police-te chuan an man zui ta niin an sawi.
Robinosn bakah hian he thil kaihhnawiha rinhlelh Ireland-ah mi pakhat man a ni a, Vietnam-ah mi pahnih man an ni bawk. Hemi chungchangah hian Vietnam chuan Ministry of Public Security leh Ministry of Foreign Affairs to the UK official-te chu British thuneitute thawhpui turin a thawn thu Vietnam Thanh Nien newspaper chuan a tarlang.
Mi 39 thi zinga 8 hi hmeichhia an nih thu tarlan a ni a, mihring hralhruk chingten England-ah hian a ruk a rala an thawn a nih rin a ni bawk. A bak thu kimchang chu police-te hian an la puangzar duh rih loh.