White House-ah Trump leh Netanyahu inhmu

US tlawha zin, Israel prime minister Benjamin Netanyahu leh US president Donald Trump-te chu Thawhlehni khan White House-a Oval Office-ah an inkawm. Kumin February thla tawp lama US leh Israel-in Iran an beih hnuah, hruaitu pahnihte hi hmaichhana a inhmuh lehna hmasa ber a ni.

US president Trump hian Netanyahu nena an inhmuh hma hian, meeting an neih turah Israel PM hian Iran chungchang a sawipui tur point a sawi chhuah avangin an lawm vak lo a, amah hrilh mai loa khawvel hriata a puang kher chu a duh loh tih a sawi. Netanyahu hian Iran-in Pickaxe Mountain-a nuclear facility a din mek nia sawiin, US nena inremna siam duh anga a insawi chu dawt a nih thu a sawi New York Post chuan a hmain a lo tarlang a ni.

Meeting hi darkar khat leh a chanve neih a ni a, an thu ngaihtuahte puanzar a ni lo. Boruak ṭha tak hnuaiah inbiakna ṭha leh hlawkthlak tak an nei tih White House press secretary Karoline Leavitt chuan a sawi. Abraham Accords huang zauh dan tur leh, Israel-Hezbollah indona chungchanga Lebanon sorkar inremna ziahpui a nih dante pawh an la sawi dun dawn nia tarlan a ni bawk.