Myanmar President-in ASEAN a sawisel

Myanmar president, sipai hotu hlui ni bawk Min Aung Hlaing chuan nimina Parliament-a thu a sawiah, Association of Southeast Asian Nations (ASEAN) in an rama inremna a awm theihna tura ruahmanna a siamte a sawisel a, hemi rual hian a kaihhruai sorkarin ruahmanna a siamte a sawilang.

Kum 2021 February thlaa sipai thuneihna hmanga Aung San Suu Kyi kaihhruai civil sorkar paihthlak a nih hnuah, mipuiten sipai rorelna duh lohna an lantir avangin tualchhung buaina nasa tak a thleng a, tun thlengin an buaina hi a la reh lo. Tualchhung buaina thleng vang hian mi nuai 1 vel an thi a, mi nuai tel hmun him lamah an tlanchhe bawk.

Nikum December leh kumin January thla khan sipai sorkar hnuaiah an ram inthlanpui buatsaih a ni a, sipai thlawp party chu hneh taka thlan tlin niin, Min Aung Hliang kaihhruai civil sorkar a ding a ni. Mahse, he inthlan hi ram hrang hrangten an sawisel a, civil sorkar ding pawh a hming mai chauh niin an ngai a ni.

Nimin kha civil sorkar a din aṭanga a ni 100-na a ni a, President Min Aung Hlaing chuan Parliament-ah thu a sawi a ni. ASEAN peace plan, Five Point Consensus tia sawi chu sawiselin, ram 11 telna pawl hian Myanmar ram chu an thliarhrang niin a puh. 'Kan dawhthei tawk tawh. Hmasawnna thlen lo tur zawnga hmalakna te chu kan chhang let zel tawh ang," a ti. Civil sorkar tharin ni 100 chhunga a hnathawh leh hmalakna hrang hrangte a tarlang bawk.