Pakistan-ah tlang lawn mi 4 ruang hmu tawh

Pakistan-a Broad Peak vur tawlhin Ningania a chhilh nia hriat, tlang lawn mi 10 zinga mi pali ruang chu nimin khan hmuh an ni.

Chin hriat loa awm zingah hian Nepali tlang lawn mi lar tak, khawvela tlang sang zual 14 lawn chhuak rang ber record chelh mektu, kum 43 mi Nirmal Purja pawh a tel a ni. Kum 2019 khan heng tlang 14 te hi thla ruk chuang awrh chhungin a lawn chhuak hman.

Tlang lawn mi 10 hi Ningani chhun lai khan khawvela tlang sang 12-na, meter 8,051-a sang Broad Peak an lawn laiin vur tawlhin a chhilh nia hriat an ni. Chhan chhuah hna thawh nghal niin, nimin khan ruang pali awmna chu hriat a ni. Mahse, an ruang awmna hmun hi kal a harsat avangin an la lachhuak thei lo a, Pakistan Army rescue helicopter pahnih hmangin mi dangte zawn hna pawh ngawrh taka thawh chhunzawm a ni bawk.

Broad Peak hi Gilgit-Baltistan biala awm a ni, Pakistan rama tlang sang leh a lawn hautakna ber zinga mi a ni. Purja kaihhruaia Broad Peak lawn chhuah tumtu, expedition team-ah hian America, China, Oman leh Nepal mite an tel.