Greece-ah kang ṭhelh hna thawktu helicopter 2 insu

Greece khawpui, Athens khawthlang lamah Porto Germeno area-ah ram kang ṭhelhnaah kangṭhelhtu helicopter pahnih chu Pathianni khan an insu a, an tla zui a ni. Helicopter-ah hian mi pahnih ve ve an chuang a, pahnih an thi a, mi dang pahnih dam chhuakin damdawi-inah enkawl mek a ni.

Prime minister Kyriakos Mitsotakis chuan chetsualna thleng chu pawi a tih thu leh, nunna chan chhungte a tuarpui thu a sawi. Thite hi Denmark mi pilot leh, Greek fire service liasion officer an ni. Chetsualna hi Psatha hmuna thleng a n.

Europe ram eng emaw zatin khawlum zual an tuar mek a, hmun tam takah ram kang nasa tak a thleng bawk, Greece hi ram kang tuar nasa zingah a tel. Greece bakah France leh Spain-ah he ram kang nasa tak thleng mekin ṭhelh hna thawh mek a ni. Kumina Europe-a ram kang hi nikum chhunga ram kang aiin square km 10,000 velin a zau tawh zawk nia sawi a ni. Khawlum zual avangin khaw lum kaihhnawihah mi tam tak an thi tawh bawk.

Porto Germeno area-a ram kang hi kar liam ta Zirtawpni aṭanga chhuak a ni a, Agios Vasileios aṭanga kang ṭanin ram takin Porto Germeno lam hia kangkai a ni. Kangṭhelhtute chuan mi 300 vel hmun hlim lamah an sawn chhuak tawh. Official lam chuan ram kang zau zawng hi la tichhuak lo mah se, wildfire meteorologist Theodore Giannaros chuan km 50 biala zau a kang tawh niin a sawi. Kefalonia-ah ram kang vangin mi eng emaw zawt chu sawn chhuah an ni bawk a, Halkidiki-a Nea Tenedos bulah ram kang a thleng bawk a ni. Kar liam ta khan Crete-ah kang ṭhelhnaah kangṭhelhtu pahnih an thi.Fire department hotu, Vasilios Vathrakoyannis chuan thli na tak a tleh tel bawk avangin ram kang ṭhelh chu a harsain a hautak hle tih a sawi a, aircraft-te pawhin an thawk ṭha thei lo tih a sawi. Ram kang ṭhelhna atan hian aircraft pariat leh helicopter te an hmang a ni.