Russia-in zan khatah Ukraine drone 605 kap thla

Russia Defence Ministry chuan Nilaini zana an ram beihna tura Ukraine-in drone a kah chhuah 605 chu an lo kahthlak sak tih nimin khan a sawi.

Ministry chuan thuchhuah siamin, Ukraine drone hi Moscow khawpui hmarthlang lam km 180 vela hla, Tver bialah air defence system-in a lo dang tih a sawi. An drone kahthlak hian e-commerce company lian, Wildberries centre a tichhe tel niin regional governor Vitaly Korolyov chuan a tarlang. Russia rama online commerce platform lar leh lian, Wildberries hmun hi Ukraine hian July thla laihawl aṭang khan a lo bei tel fo tawh a ni.

Moscow hmarlam, km 250 vela hlaa awm Yaroslavl bhial governor Mikhail Yevrayev pawhin an bial chhung beihna tura Ukraine drone kah chhuah 95 chu kahthlak an ni tih a sawi. Drone kahthlak hi in ṭhenkhatah kangmei a tichhuak a, motor chhia pawh a awm tih a tarlang.

Ukraine presidnet Volodymyr Zelenskyy chuan Ukraine sipaiten Russia ram an beihnaah oil refinery pahnih, Bashkortostan biala Bashneft-Novoil refinery leh, Yaroslavl biala Slavnet-Yanos refinery an kah fuh thu nimin khan a sawi ve bawk.