Myanmar President-in Thailand a tlawh

Myanmar president, sipai hotu hlui Min Aung Hlaing chu nimin khan Thailand-ah a zina , kum 2021-a sipai chakna hmanga Aung San Suu Kyi kaihhruai sorkar paihthla a, thuneihna a chan hnuah official-a Thailand a tlawhna hmasa ber a ni.

Thailand prime minister Anutin Charnvirakul chuan Min Aung Hlaing hi lo lawmin, Bangkok-ah guard of honor pek a ni. Hruaitu pahnihte hian nimin khan meeting nei nghalin, Myanmar ram hruaitu chuan remna leh muanna siam an duh thu leh, Association of Southeast Asian Nations (ASEAN) nena an inkar boruak ṭha zawk siam a duh thute a sawi. "Myanmar chuan democracy kawng zawhin, hun ṭha zawk beiseina nen hma lam a pan zel a ni," a ti.

Myamnar president atana lak luh a nih hnuah Min Aung Hlaing hian China, India leh Laos te a lo tlawh tawh bawk. Civil sorkar din a nih hnuah ASEAN ramte nen an inkar boruak siamṭhat tumin hma an la a, hetih lai hian member ram 11 awmna ASEAN chuan sipai sorkar hnuaia Myanmar ram inthlanpui buatsaih kha an thlawp lo a ni. Philippine foreign minister leh Myanmar-a ASEAN special envoy, Maria Theresa Lazaro chuan bloc leh Myanmar inkar boruak a pangngai anga a awm leh theih hun chu a la hlat dawn niin a sawi thung.