IS hotu Baghdadi-a farnu Rasmiya Awad an man
Syria hmarlam, Azaz khuaah Islamic State (IS) firfiak pawl hotupa Abu Bakr al-Baghdadi-a farnu Rasmiya Awad chu Thawhṭanni khan Turkey sipaiten an man.
Kum 65 mi Rasmiya Awad bakah hian a pasal leh a monu chu thu zawhfiah tura hren zui nghal an ni bawk. Baghdadi farnu hnen aṭang hian IS ho chhunglam inrelbawlna leh hnathawh dante hriat theih an in beisei thu official-te chuan an sawi.
Syria leh Turkey inrina bul Azaz khuaa firfiakte beihnaah hian Awad hi man an nih thu official-te chuan an sawi a, an manna hmunah hian naupang panga pawh hmuh an ni bawk. Baghdadi farnu Awad an man dan kimchang erawh official-te chuan an sawi lang lo.
"Firfiakte kan beihna kawngah Baghdadi farnu kan man hi hlawhtlinna ropui tak a ni," tiin President Tayyip Erdogan-a communications director Fahrettin Altun chuan a twitter-ah a ziak. Thla hlui khan US sipaite'n Syria-a Idlib hmuna beihpui an thlaknaah, IS hotupa al-Baghdadi chu danchepa a awm avangin thihchilh bomb hmangin a intihlum nia sawi a ni. Hei hi US President Donald Trump leh IS pawhin an nemnghet tawh a ni.
Baghdadi hian kum 2014 khan Syria leh Iraq ramah hian muslim lalram dinna turin ram zau tak a la a, a lal ram zauhnaah hian mi tam takin nunna an chan a, amah hi mawhphurtuah puh a ni. US Defence Department chuan Islamic State (IS) firfiak pawl hotupa Baghdadi an luhchilh lai 'footage' an tlangzarh hnuah, IS firfiak pawl chuan an pawl hotu thar atan Abu Ibrahim al-Hashimi al-Qurayshi ruat a nih thu a puang zui ve bawk. US vauna thu audio-te pawhin an tichhuak bawk a ni.