Houthi helin Yemen sipai an beihnaah sipai 30 an thi

Yemen rama Iran thlawp helpawl, Houthi chuan Ningani khan an ram khawchhak lama Hadramout leh Marib-a sorkar sipai camp beiin, sipai 30 an thih bakah mi dang 15 in hliam an tuar.

Houthi chuan sorkar sipai hmun hi ballistic missile leh drone hmangin a bei tih sawiin, heng zinga hmun ṭhenkhat chu Yemen-a Emergency Force enkawl a ni tih an tarlang. Camp bakah sipaite ralthuam dahna hmun leh an motor-te pawh an tihchhiatsak niin an sawi.

Yemen sipai pawhin an camp beih a nih thu hi sawiin, Houthi helte hian missile pariat hmangin an bei tih an sawi. Thi zat pawh hi an la pun chhoh a rinawm bawk. Helhoin camp an beih hi Emergency Forces bakah Homeland Shield Forces leh First Military Region te awmna an ni. Homeland Shield Forces hi kum 2022 a Saudia Arabia thlawpna hmanga din niin, sipai sang tel an awm a, Marib-Hadramout frontier leh Saudi border an veng a ni.

Ningani vek khan Houthi helte hian Saudi Araba chhim lam, Najran bial an kap bawk a, civil mi 11 an hliam a, an zingah hian naupang kum li mi a tel tih Saudi Arabia sipaite chuan an sawi.

Kum 2014 khan Houthi helt hian an khawpui Sanaa an la a, khawvelin a pawm Yemen sorkar chu Saudi Arabia ramah a tlanchhiat phah a ni. Hemi hnu hian tualchhung indona a thleng chhunzawm reng a, Yemen sorkar dik tak a din leh theihna turin Saudi Arabia kaihhruai ram inthurualte chu Yemen buainaah kum 2015 aṭang khan inrawlhin, Houthi helte hi an bei a ni. Mahse, tun thlengin a tu zawk mahin hnehna an la chang thei lo a, Houthi helten an ram khawpuiah ro an rel laiin, sorkar an nawr chhuak tak chuan an ram chhim lamah ro a rel thung a ni.

Houthi-te chuan tun hnaiah Red Sea leh Bab el-Mandeb Strait-a Saudi Arabia tuipui lam kawng an dang a, hei hi kum 2015 atanga Saudi ram tuipui lama Yemen a lo dan chhan letna a nih thu an sawi.