Sri Lanka president thlannaah polling booth 45,000 siam dawn

Sri Lanka Election Commission (EC) chuan November 16-a an ram president thlanna neih turah, vote thlakna tur polling booth 45,000 siam a ni dawn tih a sawi. 

EC chuan president thlanna hmasaah khan polling booth hi 35,000 siam a ni tih sawiin, kuminah 10,000 siam belh a ni dawn tih a sawi. Hei hi president candidate an tam avangin ballot paper feet hnih laia thui siam a nih vang a ni, a ti. 

Kumin president thlanna neih tura hian candidate 35 awmin, president candidate an tam ber ṭum a ni. Vote hi ballot paper hmanga thlak a nih dawn vangin, candidate te hming ziahna, ballot paper pawh hi feet hnih-a sei a ni dawn a ni. 

EC chairman Mahinda Deshapriya chuan November 17-ah inthlan result hi puan hman tum a ni tih a sawi. Mahse candidate zingah vote tla aṭanga 50% hmu pha an awm loh chuan, result tihchhuah hun hi tihkhawtlai a ni mai thei tih a sawi  nghal  bawk. 

Sri Lanka president thlanna neihpui turin, EC in a sawm angin European Unioin chuan observer team a tir lut tawh bawk. President candidate 35 zingah Sri Lanka Podujana Peramuna (SLPP) candidate Gotabaya Rajapaksa; leh rorellai United National Party (UNP) Deputy Leader Sajith Premadasa te chu inbei tura ngaih an ni. Rajapaksa hi defence minister hlui a ni a, Premadasa hi president hlui Ranasinghe Premadas fapa a ni.