Paris climate deal aṭangin US inhnukdawk
United States chuan 2015 Paris climate agreement aṭangin a inhnuhdawh tur thu a lo sawilang tawh a, Thawhṭanni khan he inremna siamah a tel tawh loh thu United Nations (UN) hnenah ziakin a hriattir.
US President Donald Trump chuan US oil, gas leh coal industry-te tihchangtlun a tiam hnuah, Paris climate deal aṭanga an inhnuhdawh tur thu hi a lo sawi tawh a ni. US hi he deal siam aṭanga inhnuhdawk ram awmchhun a la ni.
Paris climate deal hi ram 200 in an siam a ni a, ram hrang hrangte hian greenhouse gas an tihchhuah zat titlem turin intiamkamna an nei a ni. US president hlui Barack Obama khan he deal hi zawmin, US greenhouse gas tihchhuah chu kum 2030-ah 26-28% a tihtlem a tiam a ni.
President Trump chuan he deal hi na takin a lo sawisel tawh a, US bitum bikah a puh. He deal siam hian US economy thlengin a nghawng pawi thei dawn niin a sawi.Hei vang hian he inremna siamah hian an tel ve zel thei lo tih a sawi.
Trump-a thutlukna siam hian ramchhung leh pawn lamah sawisel a hlawh hle a, UN hnena ziaka an inhnuhdawh thu an hriattir hnuah, enviromental group-te chuan kum 2020-a US President thlanna neihah Trump chu a chak tawh loh ngei an beisei thu te, president thar chuan he inremna hi a rawn zawm leh ngei an beisei thute an sawi a ni.