Broad Peak-a tlang lawn mi 10 nunna chante hriatrengna hun hmang

Pakistan khawpui, Islamabad-ah Thawhlehni zan khan tlang lawn mi, ram palai leh tlawmngai pawl hrang hrangte chuan Pakistan rama tlang sang, Broad Peak-a vurtawlh nasa tak thleng avanga tlang lawn mi 10 thite hriatreng nan mombati chhiin hun an hmang a ni.

Khawvela tlang sang berte zinga pakhat, Broad Peak aṭanga tlang lawn mite zawn chhuah hna hi a hautak hle tih chhan chhuah hna thawktute chuan an sawi. Ruang pariat an la thla thei a, mi pahnih ruang erawh an hmu zo lo a ni. International expedition team-ahhian Nepal, Oman, Pakista, China, Britain leh US tlang lawn mite an tel.

July 30-a vurtawlh nasa tak thlen vanga thi zingah hian tlang lawn mi lar tak, British-Nepali Nirmal Purja pawh a tel. Nepal tlang lawn mi paruk an tel bawk a ni.

Alpine Club of Pakistan president, Irfan Arshad Khan chuan khaw ṭhat loh vangin chetsualna thlenna hi helicopter in a kal theih loh a, hei vang hian chhan chhuah hna thawktute tan pawh a hautak hle tih a sawi. Ruang pariat an hmuhte chu thlawhtheihna hmanga phur chhuah theihna hmunah an dah a ni, a ti.

Broad Peak hi Pakistan hmarlama awm a ni a, sea level aṭangin meter 8,051 a sang niin, khawvela tlang sang 12-na a ni. Khawvela tlang sang ber dawttu, K2 bulah a awm a ni. Pakistan hmarlamah hian tlang sang tak tak an awm a, heng tlang lawnchhuah tumtu chetsualna pawh a thleng fo a ni.