Trump-a'n US-in Strait of Hormuz a thunun vek tih a sawi

US president Donald Trump chuan Strait of Hormuz chu US-in a thunun vek tih sawiin an ram tan thil a kal tluang hle tih Thawhlehni khan a sawi.

President Trump hian he thu hi Joint Base Andrews a thlen hnua thuthar lakhawmtute a kawmnaah a sawi a ni. Hemi hma hian US sipaite chuan Panama flag zarna bungrua phur lawng, Iran lawngchawlh hmun pan chu Hellfire missile hmangin vawi hnih an kap a ni.

"Tunah hian Strait of Hormuz hi kan thunun vek a ni. Iran in thununna an nei lo. Keini hian kan thunun vek" tiin Trump chuan he tui kawngah hian Iran-in thil eng emaw a rawn ti a nih chuan nuai bo vek an ni ang, tiin a sawi. Iran chu a ring lo tih sawiin, dawt an hrilh reng tiin Iran chu Middle East-a thiltitheitu ber ram an ni dawn tawh lo tih a sawi bawk.

Trump chuan vauna a tawk reng tih sawiin, thla hmasaa Turkey-a NATO summit a hmang zo, Britain lam a pan tur pawh a ruka a thlawhtheihna chuanna tur a thlak thu sawi chhuakin, US Secret Service thurawn zawma thlak a nih thu a sawi. Ankara-a summit neihah hian Iran target number one a nih thu pawh a sawi lang a ni. Trump hi Air Force One-a a chuang tur chu a rukin C-32A military aircraft-ah sawn a ni. He aircraft hi Boeing 757 siam danglam niin, vice president in a hmang ṭhin a ni.