Syria President hlui Bashar al-assad thi tura hremna pe

Syria court chuan an ram president aṭanga paihthlâk tak Bashar al-Assad chu a rorel chhunga kum 14 an rama tualchhung induna thlenh tualthahn, mi nghaisak leh dan loa mi man leh hremna thleng kaihhnawihah thiam loh a chanter a, thi tura hremna a pe. Thawhlehni khan court chuan hremna tur hi a puang a, Bashar hi court-ah a inlan ve lo thung.

He hi Syria sorkarin Assad-a laka thiam loh a chantîrna hmasa ber a ni. Assad-a hi December 2024 khan President nihna aṭangin paihthlak a ni a, an ram aṭanga tlanchhiain tun thlengin a chhungte nen Russia-ah a la awm a ni. Assad paihthlak a nih hnu hian Al-Qaida commander hlui, Ahmed al-Sharaa chuan Syria sorkar thar a siam a ni.

Court-in Assad hremna tur a tihchhuah lai hian court bulah mi tam tak an pungkhawm a, court thutlukna siam chu lawmin an hnam puanzar te an lo vai a ni. Assad-a unaupa, Syrian army brigadier general hui Atef Najib pawh Daraa biala sorkar laka hel mipuite na taka beih letnaa kaihruaitu a nih avangin thi tura hremna pek a ni ve bawk.

Kum 50 chuang chu Syria hi Hafez Assad-a leh a hnuah a fapa Bashar Al-Assad te rorelna hnuaiah a awm a, sorkar rorel dan rawng tak duh lohna lantirin kum 2011 khan helna a chhuak a, hemi hnu aṭangin kum 13 chhung tualchhung indona a chhuah phah a ni. Syrian Observatory of Human Rights tarlan dânin, tualchhung induna thleng vang hian mi nuai nga chuang zet an thih phah a ni.