White House Press Secretary Karoline Leavitt a chawl dawn

US president Donald Trump tana mi ṭangkai leh pawimawh, a thlavanga hauha chanchinbu mite chhang let thiam leh huaisen tak, Karoline Leavitt chu tun thla tawpah White House Press Secretary a nihna aṭangin a chawl dawn.

Leavitt hi kum 28 mi ni a, US President spokesperson ni tawh zinga naupang ber a ni. President Trump chungchanga chanchinbu mite a hmuh ṭhinah pawh huaisen leh ṭawngkam thiam, ṭawngkam na tak taka chhang let thiam tak a ni.

President Trump chuan a social media-ah Leavitt chawlh tur thu hi tarlangin, a fate leh chhungte nena hun hman tam a duh tawh avanga chawl tur a nih thu a sawi. Leavitt chu White House Press Secretary ṭha leh a mi rin berte zinga mi a nih thu a sawi a, a hna aṭangin chawl mah se pawn lam aṭanga thurawn petu pawimawh, top outside advisor leh Republic Party-a mi pawimawh tak a ni chhunzawm zel dawn a ni, a ti.

Kumin May thla tir lam khan Leavitt hian a fa pahnihna a nei a, naute a neih dawn vang hian Apriol thla tawp lam chawlh lain, July thla laihawlah kha a hna a zawm leh a ni. A nau neih dawn vanga a chawlh lak tur pawh, president Trump thah tumna a thlen avangin a lo sawn hlat phah tawh bawk.

Leavitt chuan White House Press Secretary hna a thawk thei chu a dam chhunga chawimawina leh thil tawn hlu ber a ni dawn tih a sawi. Khawvel hmun hrang hranga zinkual a, ram hrang hrang hruaitute hmuh a, America ram chhunga ngeiah pawh dinhmun hrang hrang amite hmuh theihna hun remchang tam tak a pek avangin President Trump chungah a lawm thu a sawi.