Khawlum vangin Romania-in nuclear plant khar

Europe khawmualpuia khawlum zual thleng chhunzawm zel avanga Danube lui tui a tlem avangin Romania chuan an nuclear power station neih chhun an khar.

Cernavoda plant-ah hian reactor pahnih a awm a, he hmun aṭang hian Romania-in electric a hman zawng zawng za zela 20 vel an siam chhuak a ni. Plant khar chin tur hi sawi chian a la ni lo a, mahse ni 10 chhung vel an tihnun rin a ni lo. He plant hian khawl vawn daih nan Danube lui tui hi a hmang a; mahse lui tui awm zat hi a hniam zel a, hei vang hian tui luh tam nan kar tir lam khan thuneituten lui chhungah lung phur lawng liante an lo tipil tawh a ni.

Danube lui tui hi Romania ṭhenawm ram, Hungary pawhin an nuclear plant neih chhunah an hmang ve tho a, mahse anni erawh chuan an la khar ve lo. Europe-a lui sei ber dawttu, Danube lui tui hi ram hrang hrangah kum 30 chhunga a hniam ber ṭum a thleng a ni.

Romania-in Cernavoda plant a khar hnuhnung ber chu kum 2003 ah khan a ni. Romania hian hydropower eng emaw zat a nei bawk a, mahse lui tui tlemn hian an hydropower siam chhuahna nasa takin a tihniam tel bawk. Plant thuneitute chuan Danube lui tui a hniam lutuk tawh a, tui hip luhna atana an hman khawlte chuan tui chu an thleng pha tawh lo tih an sawi.

Boruak inthlak danglam, climate change in khawvel pumah khawlum a tizual a, Europe-ah a nasa zual a ni. Europe ram hrang hrangin khawlum zual, heatwave an tuar a, ram kang pawh nasa takin thlen tam phah bawk. Hei bakah tui lamah pawh an hnianghnar loh phah a ni.