Indonesia-a lirnghing vanga thi mi 51 tling tawh

Indonesia khawchhak lam, Flores island-a Inrinni zinga magnitude 7.7 a naa lirnghingin chhiatna a thlen vanga thi chu mi 51 an tling tawh a, mi 5,000 vel chu hmun him lamah sawn chhuah an ni tawh bawk.

Lirnghing hian in tam tak a sawi chhiat bakah leimin pawh a thlen phah nasa a, kawngpui tam tak pawh inkalpawh theih lohin a chhe bawk. An ram huna Inrinni zingda 5.58-a magnitude 7.7-a lir a nghin hnu hian aftershock vaw 341 vel a thleng leh tawh bawk. Kum 2022-a West Java-a lirnghingin chhiatna nasa tak a thlen hnua an ramin lirnghing a tawrh nat leh ber a ni. Lirnghing vang hian tsunami warning pawh tihchhuah a ni hman a, mahse a hnuah sut leh a ni.

National Disaster Management Agency (BNPB) agency in nimin zing thlenga report an dawn a tarlan danin, lirnghing vanga luah zui tlak loa in chhia hi 900 chuang a ni a; zirna in, healthcare facility, sakhaw hmun, office leh vantlang in pawimawh eng emaw zat a chhe tel bawk.

BNPB chuan harsatna tawkte chhan chhuah leh chhawmdawl hna thawh chhunzawm zel a nih thu sawiin, sorkar lamin awm lailawkna tur a siamah mi 5,000 chuang an awm mek a, ei tur leh an mamawh angte chu lirnghinnna bialah thawn luh a ni bawk tih a tarlang.