Morocco thuneituten Ceuta-a luh tum mi tam tak man

Morocco thuneitute chuan Spain ram thuneihna hnuaia awm, North Africa-a Ceuta khawpuia luh tum raltlan tam tak an lo man. Fnideq khaw thlang lama ramri panna kawngah mi 100 chuang an lo dang tawh a ni.

Kar hnih liam ta khan darkar tlemte chhungin tuipui kaltlangin mi 78,000 vel chu Morocco aṭangin Ceuta-ah hian an lo lut tawh a; an zinga mi 100 vel an thi a ni. Mahse a lut zinga tam zawk Morocco lamah thawn kir leh an ni tawh.

Ceuta-ah hian kar tawpah mi tam tak luh leh an tum tih thu a darh hnuah venhimna pawh khauh taka kalpui a ni. Security thuneitute tarlan danin, Fnideq khaw bul, ramri aṭanga km 3 vela hlaah mi 111 vel man an ni tawh a, an zinga a tam zawk chu sub-Saharan Africa aṭanga kal an ni.

Morocco police-te chuan raltlan awmkhawmte hnawh darh nan tear gas-te an hmang a ni.Morocco chuan Inrinni khan ramri-ah hian sipai officer, speedboat-te leh drone-te a thawn chhuak bawk tih a tarlang. Spain lam pawhin ramri vil tur hian security officer 1,500 chuang a dah bawk. Interior minister Fernando Grande-Marlaska chuan sipaite hi a ṭul chhung chu dah chhunzawm zel an ni dawn tih a sawi.

Grande-Marlaska chuan dan phal loha lut raltlante chu Ceutu-ah awm phalsak an nih loh tur thu leh, Spain ram pan emaw, dan anga awm phalna neih emaw pawh phalsak an nih loh tur thu a sawi. Mahse, dinhmun ṭha lo leh dinhmun hlauhawm taka awmte erawh chu ngaihnathiamna tlem a awm theih thu a sawi.

Tun hnaia tuipui kaltlanga Ceuta-a luh tum an pun nasat avangin, Spain chuan tui chunga luh danna, floating barrier te pawh a siam thar tawh bawk a ni.