Kushner-a'n Hamas hruaitu a hmu

US palai leh president Donald Trump-a makpa, Jared Kushner chuan Pathianni khan Hamas hruaitu Khalil al-Hayya nen inbiakna an nei. Hi hi Gaza-a inremna khaihlak mek chhunzawm leh tura a hmalakna niin, nimin khan Israel prime minister Benjamin Netanyahu a hmu bawk. Netanyahu hian US thlawp,Gaza-a hma lakna tur ruahmanna siama hnawl avangin US lam hian an nawr mek a ni.

Nikum khan Kushner, US palai dang Steve Witkoff leh Hamas hruaitute chu Egypt-ah an lo inhmu tawh a, an inbiakna hian inremna siam nan nasa takin a lo pui tawh a ni. Mahse, tun thlengin Hamas-ten ralthuam an hlan chungchangah inremna a la awm loh avangin hma lak chhunzawm theih lohin a la awm.

Egypt-a Hamas hruaitu Khalil al-Hayya leh Kushner te inbiakna hian darkar hnih chuang a awh a, an thu sawi dunte erawh puanzar a ni lo. Inbiaknaah hian palai hna thawktu - Egypt, Qatar, leh Turkey official-te pawh an tel bawk a ni.

Inbiakna neih hnuah Hamas chuan thuchhuah siamin, palai hna thawktute leh inremna vil tura US din 'Board of Peace' chu hmalak zelna tur 'road map' Israel-in a pawm theih nana nawr lui turin an ngen.

Israel PM Netanyahu chuan kar hmasa khan Gaza Strip tana ruahmanna, point 15 awmna chu a hnawl thu a sawi a, Hamas-ten ralthuam an dah thlak fel vek hma chu Israel sipaite lak chhuah an tum loh thu a sawi a ni.