Ukraine Defence Minister hluiin President thlanna neih phut

Ukraine defence minister hlui Mykhailo Fedorov chuan an ramin indona hmachhawn mek mah se, President thlanna neih a phut. February 2022-a Russia nen indona an neih aṭanga Volodymyr Zelensky chuan tun thlengin president hna hi ala chelh chhunzawm a ni.

Kum 35 mi Fedorov chuan YouTube-a video a tihchhuahah hemi chungchang hi sawiin, Russia avangin Ukraine rama mipui rorelna chu hrek reng a ni tur a ni lo, a ti. Ukraine chuan Europe ram zalen nih an duh avangin an bei let tih a sawi bawk. Kum 2022-a Russia-in beihpui a thlak aṭang khan Ukraine-ah hian sipai thuneihna sang pekna, martial law hman a ni. Hei vang hian inthlan pawh an nei rih lo.

Fedorov hian July thla tawp lam khan defence minister a nihna aṭanga ban a ni a, he dinhmun hi thla ruk chauh a chelh hman a ni. Ban a nih chhan hi amah leh army commander-in-chief Oleksandr Syrskyi-a te inkar inrem loh vang niin mi tam takin an ngai. Kar eng emaw zat nawrhna a awm hnu leh Syrskyi-a pawh hi thlak a ni leh bawk a ni. Ban a nih hnuah dinhmun pawimawh dang chelh tura sawm ni mah se, Fedorov hian a hnar a, defence minister ang chauha let leh a tum tih a sawi.

Video-ah hian Fedorov chuan ama mimal politica hmachhawp leh ruahmanna engmah a sawi lang lo a, indona karah rei tak tawh mah se, Ukraine-in mipui rorelna kalphung dik tak a neih leh theihna tura dan anga dik, him, leh a taka hman tlak ruahmanna neih a ṭulzia a sawi. President Zelenskyy chuan Fedorov-a video hi a la chhang let lo.