Pakistan sorkarin Imran Khan chungchanga SC thutlukna khing dawn

Pakistan sorkar chuan Supreme Court-in an ram prime minister hlui Imran Khan, lung-ina tang mek chu private hospital-a sawn tura thutlukna a siam chu a khing let dawn tih law minister Azam Nazeer Tarar chuan a sawi. Hei hian Imran Khan-a party mi leh sa bakah, amah lainattu mipui zingah lungawi lohna a chawh chhuah a rinawm hle.

Kum 73 mi Khan-a hi prime minister a nihna aṭanga paihthlak a nih hnuah thubuai hrang hrang siamsak a ni a, a thubuaiahte thiam loh chantirin August 2023 aṭang khan Rawalpindi khawpuia lung-inah a tang tawh a ni. Thubuai hrang hrang siam hi amah chuan thu dik lo, politics-a inbeihna vanga phuahchawp mai an nih thu a sawi.

Jail-a a tan hnuah Khan hriselna dinhmun hi a ṭha lo hle niin a chhungte leh a party, Pakistan Tehreek-e-Insaf (PTI) chuan an sawi fo a ni. Nikum khan a fapate chuan an pa hriselna tlakhniam chungchangah enkawlna ṭha tawk lo avanga an lungawi loh thu vawi tam tak an lo sawi tawh a ni. A ukil-te chuan Khan hi a mit dinglam a ṭha loin, a khaw hmuh pawh a fiah lo hle niin an sawi. Hei vang hian enkawlna ṭha pek an duh thu an sawi fo a ni.

Thawhlehni khan Supreme Court chuan ni hnih chhunga Islamabad-a private hospital 'Shifa International Hospital'-a Khan-a sawn tur leh, a mimal daktawr pawh hmuh phalsak turin sorkar a hriattir a ni. Mahse Pakistan sorkar court thupek tihchhuah chu dan phal chin piah lam niin a sawi a, he thutlukna hi ennawn leh tura dilna siam an tum thu Law Minister chuan a tarlang.