China-in Evergrande company dintu dam chhunga tang turin hrem

China chuan property company tlachhe tawh Evergrande dintu, Hui Ka Yan chu dam chhung lung-in tang turin a hrem a, a mimal neih zawng zawng pawh sorkarin a laksak vek bawk. Hui Ka Yan hi April thla khan sum tam tak eirua puhna thubuaiah thiam loh chantir a lo ni tawh a ni.

Shenzhen Intermediate People's Court chuan Hui hnuaia company hlui hrang hrangte pawh record dik lo siam leh an leiba an thup avangin yuan tld 15.82 (USD tld 2.35) a chawitir bawk. Evergande company tlakchhiatna hian China-a property sector a nghawng na hle a, investor-te leh ram chhunga bank-te pawhin an tuar tel.

Hui-a hi Xu Jiayin tia hriat a ni bawk a, kum 1996 khan Evergrande hi a din a ni. China-a real estate developer lian ber a lo ni tawh a, stock market-ah a hlutna hi USD tld 50 chuang a tling hman. Kum 2020-a China sorkarin ram chhunga property sector-a leiba tam lutuk thununna tura hmalakna a kalpui chuan a company hi a nghawng na hle. A leiba pung, interest pekna tur a neih loh avangin an in leh lote chu tlawm tak takin an hralh a, mahse kum 2021-ah a company hi a tlachhe ta tho a ni. April thla khan court chuan company hian in lei tumtute aṭangin in sak hmaa pawisa dollar maktaduai tam tak an lo lak tawh thu leh, pawisate chu in sak nan hman a ni lo tih a sawi. Kum 2024 khan company sum lak luh zat chu a dik loa sawi a, an lak luh aia tam daihah an report avangin USD mtd 6.5 chawitir a ni a, China-a capital market-a inhnamhnawih pawh dam chhung atan khap sak a ni bawk.