Pakistan PM-in eptute thil phut pawm inhuam

Pakistan prime minister Imran Khan chuan sorkar laka lungawi lohna lantira nawrh huaihawt mek, eptute thil phut hrang hrang chu pawmtlak a nih chuan pawmsak a inhuam tih a sawi. Hemi rual hian PM aṭanga bang tura an phutna erawh a pawm dawn lo tih a sawi. 

Islamabad-ah Thawhlehni khan eptute hian Maulana Fazlur Rehman kaihhruaiin 'Azadi March' an buatsaih a, PM Imran Khan chu bang turin an phut tel a ni. Kawngzawhnaah hian tel an ṭhahnem hle. Imran Khan chuan defence minister Pervez Khattak nen an inbiaknaah eptute thil phut hrang hrang pawmsak a remtih theih tur hi a sawi. Sorkar chuan eptu party nen inremna kawng zawnga inbiakna nei turin Khattak kaihhruai team hi a ruat a ni. 

Right-wing Jamiat Ulema-e-Islam Fazl (JUI-F) leader Rehman kaihhruaii sorkar laka lungawi lohna hi ni nga chhung lantir a ni tawh. Thawhlehnia Azadi March neihnaa telte chuan, nikuma an ram inthlanpui neih chu tihchingpen nia sawiin, PM Khan chu bang turin an phut a ni. JUI-F buatsaih sorkar duh lohna lantirna hi eptu party dang, Pakistan Muslim League-Nawaz (PML-N) leh Pakistan People Party (PPP) pawhin an thlawp.