Court thupek angin damdawi-inah Imran Khan hruai Doctor-ten a hriselna a ṭha niin an sawi

Pakistan Supreme Court thupek angin, jail-a tang mek an ram prime minister hlui Imran Khan chu a dinhmun enfiah turin nimin zing khan Islamabad-a Shifa International Hospital-ah hruai a ni. Mahse, doctor-ten a hriselna dinhmun a ṭha tawk nia an sawi hnuah jail-ah dah let leh a ni.

Khan-a party, Pakistan Tehreek-e-Insaf (PTI) chuan nimin khan AdialaJial aṭanga hospital-ah hruai a nih thu hi chanchinthar lakhawmtute hnenah an hrilh a ni. Eng ang enkawlna nge pek a nih dawn erawh an sawilang lo.

Khan-a ukil-te chuan Khan hi lung inah a hriselna a tlakhniam thu leh a mit dinglam a hmuh fiah tawh loh thu an lo sawi fo tawh a ni. Sorkar erawh chuan doctor-te report-ah hmanhmawhthlaka enkawl ngai khawpa na a awm lo tih an sawi thung.

Thawhlehni khan Pakistan Supreme Court chuan kum 73 mi Khan-a hi darkar 48 chhunga Shifa International Hospital-a sawn tur leh, a mimal doctor-te telna medical panel-te hmuh phalsak turin thupek a tichhuak a ni.

PTI thupuangtu, Zulfikar Bukhari chuan court thutlukna chuan beiseina thar a siam a, hemi rual hian an party chuan September 27 hian Khan-a tlawh phalsak tur te, a thubuaite rang taka ngaihtuah tur leh chhuah a nih theih nan ram pum huapa kawngzawh an la kalpui reng dawn tih a sawi.

Khan hi prime minister aṭanga paihthlak a nih hnuah thubuai hrang hrang siamsakin, August 2023 aṭang khan lung inah hian a tang tawh a ni. A laka thubuaite hi phuahchawp, politics vanga an beihna niin a sawi a, mahse sorkar chuan hei hi a pha thung.