Israel court-in Human rights official hnawhchhuah remti

Israel sorkarin an rama Human Rights Watch regional director, Omar Shakir hnawhchhuahna tur thutlukna a lo siam tawh chu Thawhlehni khan Supreme Court chuan a pawmpui. 

US citizen, Omar Shakir hi Human Rights Watch Israel and Palestinian policy buaipuitu a ni. Mahse Israel sorkar chuan 2017-a dan a lo siam tawh, ramdang miten  Israel sorkar leh West Bank-a Juda mite chenna siam sak chungchang dodal leh boycott a khapna hmangin a hnawtchhuak thei a ni. 

Shakir hi Israel sorkar boycott leh dodalna lantirte thlawpa puh a ni. Court-in hnawhchhuah a remtihsak tak avangin Thawhlehni aṭang khan Israel chhuahsan tur hian ni 20 hun pek a ni. Israel interior minister Aryeh Deri chuan, "Israel dodaltute chu eng mi pawh ni se, he ramah hian an awm leh hna an thawh zel kan remti ngai dawn lo a ni," a ti. 

Interior ministry hian kum hnih liamta khan Shakir-a hi work permit dilna hi a lo hnawlsak tawh a, human right group chu Palestinian-te tana thawkin politics-ah an inrawlh tel tiin an sawi a ni. Mahse a hnuah ministry hian a thutlukna siam tawh hi sutin, Shakir hi permit a pe leh ta a ni. 

Court thutlukna hi HRW chuan na takin an sawisel zui nghal. HRW executive director Kenneth Roth chuan Supreme Court thutlukna siam chuan Israel rama free expression tih chuan Palestinian te dikna chanvo humhalh sak tumna atana thusawite a huam tel ve lo tih a lantir a ni, a ti.