Thailand-a inbeihna thlengah 15 an thi

Thailand-a Yala province-ah Thawhlehni zan khan eng pawl nge tih hriat lohin security outpost an bei a, mi 15 an thi.

Inbeihna hmunah hian mi 11 an thi a, mi dang palite chu Yala damdawiina hruai an nih hnuin an hliam tuar loin an thi a ni. Yala province-a Police Colonel Thaweesak Thongsongsi chuan security outpost beitute hi tute nge an nih hriat a nih loh thu leh volunteer officer 5-in hliam an tawrh thu a sawi. He inbeihna thleng bakah hian hmundanga security outpost pahnih chu beih a ni bawk.

Pawikhawihtute hian security outpost aṭang hian silai M-16 rifle leh shotgun-te an la chhuak a, motor pawh pathum an tichhe bawk. Thailand chhim lam, muslim tamna Yala, Pattani leh Narathiwat khuaah hian inbeihna a thleng fo a, heng khaw pathumah hian kum 2004 aṭang khan misualte pawikhawihna thlengah mi 7000 chuangin nunna an chan tawh a ni. A bikin police, zirtirtute leh sorkar mi pawimawhte beih an ni fo ṭhin. Chhim lama buaina chhuah fona chhan pakhat chu muslim-te hian mahnia inrel bawl an ngiat vang a ni.