Imran Khan farnu-in court thupek bawhchhiaah Pakistan sorkar a puh

Pakistan prime minister hlui, Imran Khan-a farnu Uzma Khan chuan a nuṭapa damdawi-in dah tura tih chungchangah Pakistan sorkar chu Supreme Court thupek bawhchhiaah a puh a, hremna pe tura ngenna a theh lut.

Supreme Court chuan August 18 khan Rawalpindi-a Adiala Jail-a tang mek,Imran Khan hi a hriselna dinhmun ṭha tawk lo avangin Islamabad-a Shifa International Hospital-a ni hnih chhunga sawn tur leh, September 16-a inbiakna neih leh hma chu awm turin thuphek a lo chhuah tawh a ni. Mahse sorkar lam chuan he thupek zawm loin, August 20-21 zan khan sorkar enkawl Pakistan Institute of Medical Sciences (PIMS)-ah enkawl tura an hruai a, a hnuah Adiala Jail-ah hruai kir leh a ni.

Khan-a chhungte leh a party, Pakistan Tehreek-e-Insaf (PTI) hotute chuan he thiltih hi Supreme Court thuhek bawhchhiatna a ni tiin sorkar hmalakna chu na takin an sawisel. Inrinni liam ta khan Uzma Khanchuan Supreme Court-ah ngenna hi a theh lut. Prime Minister Shehbaz Sharif, law minister Azam Nazeer Tarar, information minister Attaullah Tarar leh sorkar hotu dangte, Adiala Jail Superintendent Sajid Baig pawh telin Court thupek an zawm loh avangin hrem turin a dil a ni.

Petition-ah hian Shifa International Hospital-a an sawn loh chhan hi hriat loh vang ni loin, Court thuphek an zah loh vang a ni, a ti. Supreme Court chu he thila mawhphurtute hnenah hian 'show-cause notice' chhuah tur leh anmahni ngei court-a inlan tura ti turin a ngen.

Hetih lai hian sorkar lam chuan security chungchang avanga PIMS-a hruai an nih thu sawiin, an thiltih chu a dik tiin a ṭang ve thung. Hospital thuneitute chuan Shifa International Hospital-a specialist pahnih pawh PIMS-a Imran Khan-a mit enfiahnaah khan an tel niin an sawi.