Britain-in June-ah G7 summit thleng dawn

British Foreign, Common­wealth and Development Office chuan Inrinni liam ta khan thu­chhuah siamin Britain ram chuan kum hnih dawna a vawi khatna atan virtual ni lo, a hmuna kala neih tur Group of Seven (G7) summit a thleng dawn tih an tarlang. 

British prime minister Boris Johnson chuan Britain G7 Presidency chu coronavirus laka khawvel ṭha zawk siamna kawngah leh khawvel hring zawk, hmabak eng zawk siamna atana ṭanpuitu turin a hmang dawn tih an tarlang bawk.

Summit hi Britain chhim­thlang lama awm Carbis Bay, Cornwall hmunah neih a ni dawn a, June 11-13 aṭanga neih tur niin Australia, India leh South Korea-te chu guest country an ni dawn.

G7 summit-a ram hruaitu kalkhawmte hian coronavirus hneh dan tur chungchang leh sik leh sa inthlak danglam nasa chungchangte an sawi ho dawn a, open trade, technological change leh scientific discovery-te mipuiin an hlawkpui dan tur chung­changte pawh an sawi ho ang.

Canada, France, Germany, Italy, Japan, United Kingdom leh United States-te chu G7 member-te an ni a, European Union pawh invitee a ni bawk.