Serbia-in China siam Covid-19 Vaccine mtd 1 lalut

China siam Covid-19 vaccine Sinopharm dose maktaduai khat zet chu Serbia-in an lalut a, Inrinni khan Belgrade Airport, Serbia a thleng tawh tih an ram sorkar thuchhuah siamah tarlan a ni.

Serbian president Aleksandar Vucic chuan vaccine hi lo dawngin he hunah hian China's Ambassador to Serbia Chen Bo, Serbian health minister Zlatibor Loncar leh Security Intelligence Agency hotu Bratislav Gasic-te pawh an tel.

Aleksandar Vucic chuan an rama China siam vaccine lakluh a ni chuan ram pahnih inkara inṭhian ṭhatna a tifiah hle tih sawiin vaccine chuan nunna nuai nga a chhanhim dawn tih leh amah ngei pawhin vaccine a lak ve dawn thu a sawi.

Serbia Agency for Medicines and Medical Devices-in a pawmpui veleh vaccine hi an pe chhuak nghal dawn a ni. Serbia ramah hian Covid-19 hripui kai mi 3,70,000 an awm tawh a ni.