China-in ni 5 chhungin khum 1,500 awmna Covid-19 hospital a sa zo

China ramah Covid-19 kai an pun chhoh leh tak avangin Covid-19 kaite enkawlna tur chu Beijing khawpui chhim lamah sak thar a ni a,  ni nga chhungin an sa zo tih state media chuan a tarlang. 

Hebei province-a Nangong-ah Covid-19 hospital paruk sak mek niin, a dang pangte chu tun kar chhung hian zawhfel an ni bawk ang. Heng hospital paruk siam tharah hian room 6,500 a awm thei dawn a ni. 

Khawvela hripui leng mek, Covid-19 hri len ṭanna, China ramah hian sorkarin hri len ṭantirh aṭangin khuahkhirhna khauh tak a  kalpui avangin hri leng pawh hi a thunun hman tawh a, boruak pawh pangngai lam a pan chho leh ṭan hman a ni. Mahse tun hnaiah a bikin Hebei province-a hri kai thar an pung chho leh a, hei vang hian sorkar pawhin rang takin hma a la zui nghal a ni. 

Nikuma Covid-19 hri len ṭantirh lam khan tun ang bawk hian China chuan hmanhmawh takin hri kaite enkawlna tur hospital hi Wuhan khawpuiah a lo sa tawh bawk. Covid-19 hri lo chhuah dan leh mihringa a darh chho dan zirchiang tura kal, World Health Organisation expert team chu Wuhan khawpuia an awm mek tawh. Kar liam ta Ningani khan thleng tawh mah se sorkar dan angin kar hnih chhung inkhunghrang tir an nih avangin pawn lamah an la chhuak thei lo a, mahse an awmna hmunah video  link hmangin Chinese expert-te nen an inkawm a ni.