Bangladesh-a Rohingya raltlanten Myanmar-a him taka let leh an phut

Bangladesh-a refugee camp hrang hranga awm, Myanmar aṭanga tlan chhia Rohingya raltlante chuan Myanmar-a him taka lak leh phutin Thawhlehni khan kawng an zawh.

Kawngzawh hi Myanmar aṭanga an tlanchhiat kum kuanaah neih a ni a, he ni hi Rohingya-te thah chimih ni, “Rohingya Genocide Day" kum 9-na tiin an vuah. Khawvel ram hrang hrangte chu Rakhine state-ah himna siamsak turin an ngen. Myanmar aṭanga tlanchhia, Rohingya mi nuai 10 chuangte chu Bangladesh chhim chhak lam, Cox's Bazar district-a refugee camp hrang hrangah an awm mek a ni.

Bangladesh sorkar chuan Rohingya-te anmahni rama hruai let an nih theihna tur hian a hmain hma a lo la tawh a; mahse, raltlante hian an tana himna tur ngaihtuah hmasak an duh avangin let duh an awm lo a ni. Hemi hnu hian Bangladesh sorkar chuan an duh lo chung tumah let luihtir an ni dawn lo tih a sawi. Kumin thla tir lam khan, Myanmar-a sipai thlawp sorkar chuan Bangladesh-a raltlan hmun hrang hranga awm Rohingya mi nuai 3 chuangte chu Rakhine state-a lo awm tawh ṭhinte an nih thu a sawi a, himna boruak a ṭhat hunah hruai let leh an inpeih thu a tarlang a ni.