Malaysia PM hlui a thil neih zepah puh

Malaysia prime minister hlui Ismail Sabri Yaakob chu a thil neihte dik taka puangzar loa zepa puhin Kuala Lumpur court-ah thubuai theh luh a ni. Tun hnaiah Malaysia PM hlui dang pahnih chu eiruk kaihhnawih thilah hrem an lo tawk tawh bawk.

Ismail Sabri hi kum 2021- 2022 inkar khan thla 15 chhung Malaysia Prime Minister dihmun hi a chelh a ni. Ram chhung leh ram pawna a thil neihte leh neih dante zepah puh a ni. Ismail Sabri hian he puhna hi a pawm loh thu a sawi a, ringgit 300,000 (USD 74,534) pein bail-in a chhuak. Thubuai siamsakah hian thiam loh chantir a nih chuan kum nga thleng lung-in tan leh ringgit 100,000 thleng chawitir theih a ni ang.

Nikum March thla khan eirukna do pawl, anti-graft agency chuan eirukna leh pawisa chetvel dan dik tawk lo chungchang an chhui zui hnuah, PM hlui hi a thil neih puang turin an hriattir tawh a, hemi hnu hian USD mtd 40 vel hu a thil neih an lo hrensak tawh bawk. An thil mansak zingah hian pawisa fai ringgit maktaduai 170 vel leh rangkachak tlang kg 16 a tel tih agency chuan a tarlang. Ismail Sabri hian PM a nih hma hian MP leh PM pathum hnuaiah cabinet minister a lo ni tawh a ni.