Bangladesh-in Mecca Pact zawm dan ngaihtuah

Bangladesh sorkar chuan "Mecca Pact" zawm chu an ngaihtuah mek a, an ram chhungah thlawptu pawh an pung zel. He inremna zawm tur hian sawm a nih thu tarlan a ni bawk.

Bangladesh prime minister Tarique Rahman-a cabinet-a lak luh thar, Foreign Affairs-a minister of state Humayun Kabir chuan Jeddah-a OIC Extraordinary Council of Foreign Ministers vawi 23-na neih kar lakah Saudi foreign minister HH Prince Faisal bin Farhan Al Saud hmuin, an inbiaknaah hian Bangladesh-in Mecca Pact a zawm tur chungchang chu sawi chhuah a ni.

Mecca Joint Defence Agreement hi August 7, 2026-a Saudi Arabia, Turkey leh Pakistan-te’n ram pathum inremna trilateral security pact an ziah a ni. Pakistan Foreign Ministry sawi danin, he inremna hian venhimna lama thawh hona a siam a; member tu pawh sipai hmanga beih an nih chuan, ram pathumte beihna anga ngaih tur a ni.

Saudi Arabia hian Bangladesh chu he inremna zawm tur hian a sawm tawh a, mahse engtik hunah nge sawmna hi pek a nih tih erawh sawilan a ni lo.

He inremna zawm hi eptu lam pawhin an thlawp a, Leader of Opposition leh Islamic pawl, Jamaat-E-Islami chuan "Makkah Pact zawm hi Bangladesh tana mahni puala thutlukna a siamtur leh ram chhung thil a ni. Bangladesh hian a ram leh a mite mamawh leh hmasawnna tur thutlukna a siam a nih chuan, midang tana lo rilru hah emaw lo phi buai phah tur a ni lo, tiin X-ah an tarlang.