Switzerland-a Rave party neihnaah inkahna thleng

Switzerland hmar lama 'rave party' neihnaah silai hmehpuah a ni a, mi pakhat a thi a, mi dang panga an hliam tih police-te chuan Pathianni khan an sawi. Hliam tuarte zingah hian ngaihtuahawm takte pawh an awm.

Inkahna thlenna hmun hi Zurich hmar lama Aarau khuaah niin, an ram huna nimin zing dar 3 rik hma deuha thleng an ni. Kum tina neih ṭhin 'techno party' mi 3,500 vel an kal a ni. Pawikhawihna a thlen hnu hian police leh fire official-te bakah,regional disaster response unit (KKE) pawh tirh nghal an ni.

Police thupuangtu Vanessa Rumpold-i chuan he party neihna racecourse chhungah ngei silai hi hmehpuah a ni tih a sawi a, "Mi tam tak awmna laiah silai hi vawi tam tak hmeh puah a ni," a ti. Pawikhawihtu hi tunge tih hriat a la ni lo a, zawn mek a nih thu police-te chuan an sawi bawk. Nimin army helicopter hmangin a inkahna thlenna leh a chhehvel te pawh enfiah a ni.