Iceland mipuiten EU zawm tumna an duh lo

Iceland chuan kum 13 kaltaa inbiakna an lo titawp tawh, European Union (EU) zawm leh tuma inbiakna neih leh rawtna awm chungchangah mipui vote a la a, mahse vote thlaktu tam zawkin sorkar rawtna an hnawl.

Vote thlaktu mi 225,000 chuang zinga 52.8% chuan EU zawm leh tumna hi duh loin, sorkar rawtna hi an hnawl a, 47.2% chauhin an thlawp a ni.

Prime minister Kristrún Frostadóttir-i kaihhruai sorkar chuan kum 2027-ah mipui ngaihdan lakna neih a tiam tawh a; mahse, vote lak hun hi a pawt hnai leh ta zawk a ni. A pawt hnaih chhan pakhat hi US president Donald Trump-a'n Greenland a vau vang niin an sawi.

Iceland thliarkarah hian mi 400,000 vel an cheng a, a ram mipui hian security lam aiin, an eizawnna ber sangha manna leh zawrhna, fishing industry chungchang hi an ngaihven zawk thung. 'Duh lo' lama vote tute chuan EU an zawm a nih chuan EU dan hnuaiah an sangha manna hmun hlawk tak takte chunga thuneihna chu an chan an hlauthawng a ni. EU hian an member ramte sangha man tam zawng hi a bituk sak ṭhin.

Mipui ngaihdan laknaah hian vote thlak thei mi 270,000 vel awmin, vote thlak hi 82.5% an tling. Iceland hi EU single market leh Schengen bialah a tel sa tawh a, EU-ah hian an lut pumhlum a nih chuan, 'customs union' leh pawisa thuhmun hmanna,'eurozone' bialah an tel chhunzawm tawh dawn a ni. Kum 2008-a khawvel sum leh pai harsatna thleng leh Iceland banking system a tlukchhiat hnuah, kum 2009 khan Iceland hian EU zawm tur hian dilna a lo theh lut tawh a ni.